Friday poem: 'To A Mouse, On Turning Her Up In Her Nest With The Plough'
by Robert Burns
Wee, sleekit, cow'rin, tim'rous beastie,
O, what a panic's in thy breastie!
thou need na start awa sae hasty,
Wi' bickering brattle!
I wad be laith to rin an' chase thee,
Wi' murd'ring pattle!
I'm truly sorry man's dominion,
Has broken nature's social union,
An' justifies that ill opinion,
Which makes thee startle
At me, thy poor, earth-born companion,
I doubt na, whiles, but thou may thieve;
What then? poor beastie, thou maun live!
A daimen icker in a thrave
'S a sma' request;
I'll get a blessin wi' the lave,
An' never miss't!
Thy wee bit housie, too, in ruin!
It's silly wa's the win's are strewin!
An' naething, now, to big a new ane,
O' foggage green!
An' bleak December's winds ensuin,
Baith snell an' keen!
Thou saw the fields laid bare an' waste,
An' weary winter comin fast,
An' cozie here, beneath the blast,
Thou thought to dwell-
Till crash! the cruel coulter past
Out thro' thy cell.
That wee bit heap o' leaves an' stibble,
Has cost thee mony a weary nibble!
Now thou's turn'd out, for a' thy trouble,
But house or hald,
To thole the winter's sleety dribble,
An' cranreuch cauld!
But, Mousie, thou art no thy lane,
In proving foresight may be vain;
The best-laid schemes o' mice an 'men
Gang aft agley,
An' lea'e us nought but grief an' pain,
For promis'd joy!
Still thou art blest, compar'd wi' me
The present only toucheth thee:
But, Och! I backward cast my e'e.
On prospects drear!
An' forward, tho' I canna see,
I guess an' fear!
Written in 1785, this wonderful poem has had a long life, not only in its own right but also in giving the title to John Steinbeck's novella Of Mice and Men, in Sharon Olds' poem 'Sleekit Cowrin'' and, less well-known, in Monty Python's 'Word Association' sketch, in which 'we' is replaced with 'wee, sleekit, cow'rin, tim'rous beastie'.
Get our Friday poem straight to your inbox.
If you want to see exactly what you'll be getting, have a look here, here and here.